toki nasa pi ike mi.txt

mi lon kulupu kule mute, taso mi kule mute ala. ni li lon: mi olin unpa e mije e meli e tonsi. (taso tenpo ni la mi wile ala pali e ni. ken la tenpo ala la mi wile.) ni li kule. taso ante la mi kule ala. mi tonsi ala, li sona ala e ni: kule kon li seme. mi lon ala kulupu pi sijelo wan. kon mi li soweli ala. ken la kon mi li ala. mi mijomi, taso mi wile ala kamalawala.
ni li toki nasa. jan li ken jo ala e nasin kule ale, li awen kule. taso ijo ante li lon kin: pilin mi la, mi lon pona ala lon kulupu kule. ona li nasa tawa mi. taso kulupu jan *ale* li nasa tawa mi. n.
awen la, mi lon kulupu mute pi jan tonsi mute. jan li toki e ni: tonsi li tawa poka tonsi tan usawi. taso sona mi la, mi tonsi ala. mi pilin ala e kule kon. ken la ona li lon insa pi jaki mute. nasin seme la mi ken weka e jaki?
kin la, mi pilin ala e ijo mute: e pilin pona, e pilin ike, e pilin wile. ken la ona li awen lon, li awen ante e pali mi, taso mi sona ala e ona. ken la ni li nasa ala. ken la jan ale li pilin lili taso, li toki taso e pilin suli.
taso mi wile pona e ni. mi wile pilin wile. tenpo ni la mi wile ala e pali, li pali ala. ken la mi o lukin mute ala e linluwi, tan ni: musi mute li lon ona, li lili e pilin musi mi. ken la mi o pali e ni lon tenpo suno ale: o pini e lukin, o insa o weka e kon, o lukin taso e toki insa, o weka e ona. (tenpo pini la mi pilin e ni: nasin ni li wile e ni: o pilin ala e ijo tan toki insa. ni la, ona li pakala namako e pilin. taso tenpo ni la mi sona e ni: nasin ni li linja e sijelo e lawa, li pana sin e pilin sijelo.) mi wile pali e ni, taso mi pali ala. mi toki insa e ni: "tenpo poka la mi open pali e ijo lon tenpo suno ale.". taso musi Weko li pakala e ni. (musi Weko li musi ni: jan li kama jo e sijelo mute pi leko tu tu, li pana e ona lon poki. linja pi leko luka luka li lon la, ona li weka e leko. nimi mi ona li tan ni.)
kin la, musi Weko li pakala e ijo mute. tenpo pini poka la, mi o pali e kulupu sitelen toki pi ilo pi ma Losi. taso mi pali e ni lon pini a pi tenpo suno ken tan musi Weko. (musi la, ona li tan ma Losi kin, a a a!)
ike wan ona li tan ni: musi Weko mi li musi utala pi jan tu. ni la, mi open musi la, tenpo Minute luka luka la mi ken ala pake. mi pini la, tenpo poka la mi open sin. open li wile e tenpo lili lili taso, taso ona li lanpan e tenpo mute.
...taso mi o toki ala e ni: "mi ike ala. musi Weko li ike.". taso jan ante li toki e ni tawa mi: "sina pona a! o toki ala e ike sina!". kin la, ona li toki e ni: "sina suwi!". taso tenpo ni la mi suwi ala. jan ale li toki e "suwi" mi la, mi kama wile ala pali tawa suwi lon. (ken la ni li toki powe mi.) kin la jan li awen toki e "pona" mi. mi wile ala e ni, li toki e wile ala mi, taso jan li awen. ni li nasin kulupu anu seme? ona li nasin nasa.
wile pali la, mi pilin e ni: mi tu li lon. (mi lon ala kulupu pi sijelo wan. ni li nasin pi sitelen insa taso.) mi sona e ijo. lawa mi li pilin e ijo. mi wile pali, taso lawa mi li wile ala. ...mi sona ala e ni: toki kama o seme. ike a.
"toki powe mi" la, mi pilin e ni: mi toki e ijo, taso mi pilin lon ala e ona. jan powe lon insa lawa mi li pilin e ona. mi toki musi tawa jan ante wan kepeken jan powe ni. ona li pilin ike mute tan ike lili. ona li pakala lili lon toki la, ona pana e telo lukin, li wile weka lon tenpo ale. ken la mi kama jan powe ni tan mute pi musi mi. pona la, tenpo pini poka la mi open pake lili e musi, tan ni: jan ante li wile ala musi. kin la, tenpo ale la ona li wile ala e ni: jan musi mi li toki e pilin ike. taso mi pake ala. ona li jan musi taso la, mi pake ala tan seme? mi pilin e ni: toki ike mi li kama nasin. mi sona ala e toki ken ante.