nena sinpin.txt

nena sinpin li pilin e lili moku lon kon. ni la, jan li sona e ni: moku li lon poka. nena sinpin li jo e linja lili mute mute. ona li lanpan e lili moku tan kon, li toki e lon ona tawa lawa. linja ale li pilin e lili moku ante. ni la, jan li sona e nasin moku. nena uta li ken pilin e ona kin, taso ona li pilin e nasin pi mute lili taso: e suwi, e namako, e pilin nasa, e pilin ma, e pilin soweli, e pilin pi telo ko jelo. (pilin seli li pilin moku ala, li pilin ike tan pakala.) ni la, ona li pana e lili moku tawa nena sinpin, li wile e ni: ona li pana e sona namako pi nasin moku. ko jaki laso mute li lon nena sinpin la, jan li ken ala pilin pona e nasin moku.
mama mi li toki e ni: lete la, o moku e kon kepeken nena sinpin. ona li seli e kon, li weka e jaki lili tan ona, li pana e telo lili. uta li pali ala e ni. ni la, jan li moku e kon lete kepeken uta la, sijelo ona li ken jaki. nasa la, jan li moku e kon kepeken uta lon tenpo mute la, jan ante li pilin e ni: ona li jan nasa. toki Inli la, "jan pi moku kon uta" li toki ike. ken la ona li tan kalama ona? ken la jan o open ala e uta ona lon tenpo ale? ken la ona li moku ken e pipi kon?
lupa tu li lon nena sinpin. tenpo ale la, lupa wan li pake lili. ni li tan ni: linja lili li ken pilin e lili moku mute lon open ale. taso lili moku mute ante la, pake lili li pona. poka pake li kama ante lon tenpo mute. ni la, ni li lon ala: lupa wan li pali mute, li pakala lon tenpo lili. tenpo mute la ni li ike ala, taso sijelo li jaki la, pake li kama suli.